Пад Аўдзееўкай узбунтаваліся акупанты з Тувінскай горнай штурмавой брыгады РФ

• 19.10.2023, 15:21

Ад роты ў іх засталося 12 чалавек.

Расейскі акупант Іван Палееў на сваёй старонцы ў сацсетцы апублікаваў допіс, у якім надумаў высветліць сітуацыю наконт Аўдзееўкі.

Паводле ягоных слоў, ён і яго аднапалчане больш за год не былі ў адпачынку. Акупант адразу ж даў зразумець, што публікуе допіс на свой страх і рызыку, але ўпэўнены, яго распаўсюдзяць паблікі і мясцовыя жыхары Тарапца, паведамляе dialog.ua.

Палееў прызнаўся, што быў мабілізаваны ў 1007-й цвярскі мотаполк, які ўваходзіць у склад Тувінскай горнай штурмавой брыгады.

Ён сам і ягоныя аднапалчане-акупанты больш за год знаходзяцца на вайне, але ў адпачынку яшчэ не былі. Паводле ягоных слоў, пазіцый за гэты перыяд яны не здавалі, але з роты ў шэрагах засталося ўсяго 12 чалавек. На просьбы дазволіць схадзіць у адпачынак камбрыг заяўляе, што "вы ўсё памраце і гэта будзе добра".

Акупант скардзіцца, што такія словы і дзеянні з боку камбрыга "не надаюць сіл, упэўненасці і матывацыі". Рэшткі роты адмаўляюцца "паляпшаць і без таго выдатную статыстыку страт".

Акупант таксама паведаміў, што зараз яны ўсе знаходзяцца ў раёне Аўдзееўкі.