Кітаец, які ваюе супраць Украіны, паскардзіўся на варункі ў расейскім войску

• 21.01.2024, 21:40

І просіць дапамогі ў МЗС сваёй краіны.

Кітаец, які ваюе на баку Расеі, паскардзіўся на варункі ў войску і паведаміў, што марна спрабуе вярнуцца ў Кітай на лячэнне. Пра гэта паведамляе Bild.

У сацыяльнай сетцы X з'явілася відэа, на якім кітайскі найміт, які ваюе з расейскага боку ва Украіне, апавядае аб тым, што ён моцна застудзіўся, у яго апухла і гноіцца горла.

“Тут няма ніякай медыцынскай дапамогі. Усім усё адно. Боль забівае мяне», — скардзіцца ён. Са слоў вайскоўца, лекар пасля агляду не забяспечыў належнага лячэння.

«Я звярнуўся ў кітайскую амбасаду ў Расеі. Яны сказалі, што гэта мая асабовая праблема, — кажа мужчына. — Я павінен скончыць свой кантракт тут і вярнуцца ў Кітай, каб аднавіцца».

На відэа кітаец кажа, што 40 хвілін ішоў у пошуках мабільнай сувязі, каб адправіць паведамленне, і просіць дапамагчы яму звязацца з МЗС Кітая.

Да гэтага мужчына запісваў відэа, як ён з расейскімі вайскоўцамі адпраўляецца на фронт.