Орбан напісаў ліст Пуціну

• 21.03.2024, 21:37

Прэм'ер-міністр Вугоршчыны выказаў жаданне нарошчваць супрацоўніцтва паміж краінамі.

Прэм'ер-міністр Вугоршчыны Віктар Орбан напісаў віншавальны ліст дыктатару Уладзіміру Пуціну ў гонар ягонага «перавыбрання» на пасаду прэзідэнта РФ.

Пра гэта заявіў прэс-сакратар прэм'ера Берталан Хавасі, паведамляе Index.hu.

Адзначаецца, што пасля абвяшчэння афіцыйных «вынікаў выбараў» у РФ Орбан пастанавіў накіраваць ліст, у якім павіншаваў Пуціна з «перавыбраннем» на пасаду прэзідэнта Расейскай Федэрацыі.

У лісце ён выказаў радасць, што супрацоўніцтва Вугоршчыны і Расеі грунтуецца на ўзаемнай павазе, што «дазваляе абмяркоўваць важныя пытанні нават у цяперашняй, вельмі складанай геапалітычнай сітуацыі».

«Вугоршчына стаіць на баку міру, і краіна перакананая, што падтрыманне дыялогу з'яўляецца асноватворнай умовай для найхутчэйшага ўсталявання міру», – ідзецца ў лісце Орбана.

Хавасі дадаў, што Орбан выказаў Пуціну жаданне нарошчваць супрацоўніцтва паміж краінамі ў сферах, не абмежаваных міжнародным правам.