Абяцаныя Балгарыяй 100 БТР нарэшце едуць ва Украіну

• 6.03.2024, 21:46

Фотафакт.

Балгарыя пачала працэс транспартавання ва Украіну 100 бронетранспарцёраў БТР-60, пра якія дамовіліся яшчэ восенню 2023-га. Пра гэта паведаміў балгарскі тэлеканал bTV у сераду, 6 сакавіка.

Як адзначылі журналісты, першы бронетранспарцёр быў загружаны на платформу і адправіўся да чыгуначнай станцыі ў Новым Іскіры. Адгрузку БТР пачалі 6 сакавіка, іх будуць выпраўляць ва Украіну партыямі 6 штук. Таксама ў паведамленні гаворыцца, што Балгарыя ўвогуле паставіць 110 БТР, а не 100, як паведамлялася раней.

Пагадненне пра перадачу Украіне 100 БТР паміж балгарскім і ўкраінскім міністэрствамі ўнутраных справаў было падпісанае ў Сафіі 8 жніўня і ў Кіеве 13 лістапада 2023 года. У заяве парламенцкага камітэта абароны Балгарыі было сказана, што гэтыя БТР не патрабуюцца МУС Балгарыі.

На фота можна ўбачыць, што БТР знаходзяцца ў даволі дрэнным тэхнічным стане. На іх знятая штатная зброя, якой з'яўляецца 12,7 мм кулямёт. Таксама відаць і механічныя пашкоджанні.