Украіна разам з Нідэрландамі будзе вырабляць беспілотнікі

• 10.10.2025, 22:54

Падпісаны мемарандум.

У пятніцу, 10 кастрычніка, Украіна і Нідэрланды падпісалі мемарандум аб сумеснай вытворчасці беспілотнікаў. Пра гэта паведаміў Офіс Прэзідэнта Украіны.

Прэзідэнт Уладзімір Зяленскі сустрэўся з міністрам абароны Нідэрландаў Рубэнам Брэкельмансам. Кіраўнік дзяржавы падзякаваў ураду і народу Нідэрландаў за падтрымку Украіны.

Ад пачатку поўнамаштабнага ўварвання Нідэрланды надалі Украіне дапамогу на $9 млрд. Кіеў разлічвае на працяг гэтай падтрымкі.

Таксама Зяленскі падзякаваў Брэкельмансу за каля $600 млн у межах ініцыятывы PURL. Падчас сустрэчы бакі абмеркавалі далейшае развіццё гэтай ініцыятывы, важнасць яе напаўнення новымі ўнёскамі і далучэння іншых краін.

Асобная ўвага — сумеснай вытворчасці дронаў, што, паводле меркавання прэзідэнта, з'яўляецца адным з найбольш перспектыўных напрамкаў двухбаковага супрацоўніцтва. У прыватнасці, бакі абмеркавалі рэалізацыю мемарандума. Адпаведны дакумент у канцы сустрэчы падпісалі Брэкельманс і міністр абароны Дзяніс Шмыгаль.

Таксама прэзідэнт уручыў міністру абароны Нідэрландаў ордэн «За заслугі» II ступені.

Шмыгаль удакладніў, што пагадненне прадугледжвае запуск сумеснай вытворчасці далёкадыстанцыйных БпЛА ў Нідэрландах з прыцягненнем 110 млн еўра інвестыцый у межах ініцыятывы Build with Ukraine.