У Расіі пачнуць прымяняць дырыжаблі для абароны ад БПЛА

• 21.10.2025, 23:35

Як у Першую сусветную вайну.

У Тульскай вобласці на прадпрыемстве хімічнай прамысловасці размесцяць аэрастатную сістэму абароны ад беспілотнікаў. Тэндэр на пастаўку дырыжабляў з сеткай заўважыла выданне Daily Storm. Паводле дадзеных выдання, гэта пакуль адзіная падобная дзяржзамова ў Расіі. Назва прадпрыемства і падрабязнасці кантракта не раскрываюцца з меркаванняў бяспекі.

Тэхналогія аэрастатных загараджэнняў прымянялася яшчэ ў Першую сусветную для абароны гарадоў ад авіяўдараў. Прынцып застаўся ранейшым: у небе паміж дырыжаблямі нацягваецца сетка, толькі цяпер — для перахопу дронаў.

У дзяржаўным сектары падобныя рашэнні ўкараняюць з цяжкасцю, у тым ліку з-за дарагавізны.

Пра стварэнне ў Расіі сістэмы абароны ад беспілотнікаў з сеткі лунаючых у паветры аэрастатаў паведамлялася яшчэ год таму. Яна атрымала назву «Бар'ер». Распрацоўшчык сцвярджаў, што сістэма прайшла выпрабаванні на палігоне і здольная лавіць дроны на вышыні да 300 метраў, а адзін аэрастат вытрымлівае нагрузку да 30 кг. Пры гэтым некаторыя ўкраінскія БПЛА значна цяжэйшыя. Напрыклад, беспілотнік «Люты» важыць 250–300 кг, а E-300 Enterprise — да 540 кг.