ЗСУ разграмілі армію РФ пад Дабрапіллем

• 27.10.2025, 22:32

Апублікаваныя ўражлівыя кадры шасцігадзіннага бою.

На світанку 27 кастрычніка расійская армія здзейсніла чарговую буйную механізаваную атаку на Дабрапольскім напрамку. Акупанты спрабавалі прарвацца да вёсак Шахава і Уладзіміраўка. І скончылася гэта для іх грандыёзным разгромам.

Уражлівыя кадры бою апублікавалі ўкраінскія абаронцы, перадае Dialog.UA.

У наступе ўдзельнічалі 29 адзінак бранятэхнікі. Бой цягнуўся больш за шэсць гадзін, але спроба праціўніка захапіць населеныя пункты цалкам правалілася.

Страты расійскай арміі аказаліся сур'ёзнымі: знішчана 15 адзінак тэхнікі, уключаючы 2 танкі, 12 баявых браняваных машын і 1 аўтамабіль. Большасць варожай пяхоты была ліквідаваная дакладнымі ўдарамі FPV-дронаў. Украінскія падраздзяленні працягваюць зачыстку тэрыторыі ад разбеглых у розныя бакі салдат Пуціна.

33-я асобная механізаваная брыгада, якая абараняла пазіцыі пад Уладзіміраўкай, расказала пра бой.

«Шэрая і сырая раніца панядзелка пачалася са штурму, які вораг падзяліў на дзве хвалі… Акупантаў сустрэлі бомберы і FPV… У агні і пад абстрэлам «чарапашкі» паспешна высадзілі захопнікаў у лесапасадках на ўскраінах вёскі, не здолеўшы дасягнуць выніку. На разгубленых расіян казакі на дронах зладзілі паляванне. Рэшткі тэхнікі паспешліва адкаціліся назад», — паведамілі ўкраінскія воіны.

Расійскія войскі працягваюць несці цяжкія страты, не дасягаючы ніякіх стратэгічных поспехаў.