Літва ўручыла ноту пратэсту Беларусі

• 21.11.2025, 22:48

Рэжым Лукашэнкі не выпускае з краіны літоўскія фуры.

Прадстаўніку пасольства Беларусі ў Літве была ўручана нота пратэсту ў сувязі з дыскрымінацыйнымі дзеяннямі ў дачыненні да літоўскіх перавозчыкаў. Пра гэта 21 лістапада паведаміў МЗС Літвы.

«Беларускаму боку было паведамлена, што Літва расцэньвае наўмыснае невыпусканне з тэрыторыі Беларусі цягачоў, прычэпаў і паўпрычэпаў, якія належаць літоўскім кампаніям і грамадзянам, як наўмыснае адабранне маёмасці і грубае парушэнне агульнапрызнаных нормаў міжнароднага права», — гаворыцца ў паведамленні МЗС Літвы.

Ведамства настойліва запатрабавала ад Беларусі неадкладна спыніць названыя дыскрымінацыйныя дзеянні. І папярэдзіла, што Літва пакідае за сабой права звярнуцца ў суд з адпаведным іскам, патрабаваць кампенсацыі нанесенай шкоды і прыняць іншыя меры ў адказ як на нацыянальным узроўні, так і на ўзроўні Еўрасаюза.