У Менск прыязджаў прадстаўнік афганскіх талібаў

• 24.08.2025, 20:50

СМІ сцвярджаюць, што раней ён заснаваў школу смяротнікаў.

Беларусь наведала "дэлегацыя" пасольства Афганістана ў Маскве. Яе асноўнай мэтай нібыта была ацэнка ўмоў утрымання афганскіх зняволеных і вывучэнне магчымасцяў іх рэпатрыяцыі на радзіму. Пра гэта паведамляе “Зеркало” са спасылкай на афганскае выданне Ariana News.

Дэлегацыю ўзначаліў Хафез Абдула Ясір, кіраўнік афганскай місіі ў Расеі. Афганскае незалежнае медыя-выданне Sangar.info сцвярджае, што ў мінулым Ясір стварыў першую школу тэрарыстаў-смяротнікаў у Афганістане і лічыўся адным з іх галоўных настаўнікаў.

Як піша афганскае выданне radiokunduz.com, пра паездку афганскай дэлегацыі ў Беларусь, дыпламаты сустрэліся з «шэрагам беларускіх афіцыйных асоб» (з кім менавіта — не ўдакладняецца) і абмеркавалі праблемы, з якімі сутыкаюцца афганскія зняволеныя.

Паводле звестак выдання Ariana News, прадстаўнікі талібаў казалі пра тое, як вярнуць на радзіму афганскіх грамадзян, якія цяпер знаходзяцца ў беларускіх турмах. Праўда, колькі іх, не ўдакладняецца.

Нагадаем, у 2021 годзе рух "Талібан" захапіў уладу ў Афганістане. Расея стала першай краінай, якая афіцыйна прызнала ўрад талібаў. У красавіку 2025 года Вярхоўны суд Расеі зняў з талібаў статус “тэрарыстычнай арганізацыі”. У ліпені 2025 года Расея прыняла даверчыя граматы новага пасла Афганістана.