Чэхія накіравала верталёты для абароны Польшчы

• 14.09.2025, 19:40

Яны прыбудуць у краіну 14 верасня.

Чэшская верталётная частка спецыяльных аперацый, якая складаецца з трох верталётаў Мі-171Ш, прыбудзе ў Польшчу 14 верасня.

Пра гэта паведаміла міністр абароны Чэхіі Яна Чэрнохава, цытуе Radio Prague International.

Тры верталёты Мі-171Ш прыбудуць у Польшчу 14 верасня, а таксама да 150 чэшскіх салдат будуць разгорнутыя на тэрмін да трох месяцаў. Яны пачнуць аперацыі на працягу некалькіх дзён.

«Мандат, ухвалены Палатай дэпутатаў летась і дзеючы да 2026 года, прадугледжвае ўзмацненне ўсходняга крыла НАТА ў межах перадавой прысутнасці», — адзначыла Чэрнохава.

Кіраўніца Мінабароны краіны дадала, што Чэхія пакуль не ўдзельнічае ў аперацыі НАТА «Усходні Страж», але калі вырашыць далучыцца, для гэтага спатрэбіцца новы мандат Палаты дэпутатаў і Сената.