Магілёў ахапіў смеццевы калапс

• 12.01.2026, 15:44

Кантэйнеры патанулі ў адходах.

Навагоднія святы і зацяжныя снегапады паралізавалі сістэму вывазу смецця ў Магілёве. Жыхары некалькіх раёнаў паведамляюць пра перапоўненыя кантэйнеры і горы адходаў, паведамляе «Могилев.Онлайн».

Жыхары раёнаў скардзяцца на перапоўненыя сметнікі. Адходы складаюць побач з кантэйнерамі, і іх колькасць месцамі пачынае выходзіць за межы пляцовак.

Сітуацыя ўскладняецца тым, што нават там, дзе пад’езды для спецтэхнікі расчышчаныя, смецце застаецца на месцы. Паводле інфармацыі «Могилев.Онлайн», камунальныя службы сутыкнуліся з нетыповай праблемай: з-за рэзкіх перападаў тэмператур і снегу кантэйнеры шчыльна ўмерзлі ў лёд і іх не могуць перагрузіць у смеццявозы.

Мясцовыя жыхары назіралі працу спецыяльных камісій, якія фіксуюць стан пляцовак на фота, аднак рэальных зрухаў пакуль мала.