У мінскай школе шасцікласнікаў на дзве гадзіны адправілі прыбіраць снег пры -16?

• 12.01.2026, 18:40

У сацсетках разгарэлася дыскусія.

Карыстальніца Threads расказала, што ў мінскай школе яе сына-шасцікласніка адправілі на дзве гадзіны прыбіраць снег пры -16 градусаў. Пад гісторыяй ужо разгарэлася дыскусія на тысячу каментароў, піша «Зеркало».

«Сёння хлопчыкаў у школе замест працоўнага навучання адправілі прыбіраць снег, два ўрокі і перапынак, а гэта амаль дзве гадзіны яны правялі на вуліцы пры -16. Бацькоў не папярэджвалі. У нас школа проста ў двары, сын цёпла не апранаўся, дайсці — дзве хвіліны. І вось ён прыбіраў снег дзве гадзіны, у тонкіх штанах, у тонкіх пальчатках. Зараз стаіць пытанне — тэлефанаваць у Міністэрства адукацыі на гарачую лінію ці гэта не мае сэнсу? Школа проста ў цэнтры Мінска. Што параіце?

Дапаўняю: пытанне не ў тым, што дзеці прыбіралі снег, а ў тым, што нас не папярэдзілі і дзіця не апранулася для працяглага знаходжання на вуліцы пры мінус 16. Хаця б узяў непрамакальнае адзенне і цёплыя шкарпэткі. І дапаўню, гэта шосты клас. А паводле ўсіх нормаў пры -15 адмяняюць урокі фізкультуры на лыжах, і гэта адзін урок, а не два. А калі б гэта былі дзяўчынкі? А калі б любое дзіця было пасля лікарнянага?» — напісала карыстальніца elena8aleksandrovna 12 студзеня.