Генсак НАТА паведаміў пра катастрафічныя страты арміі РФ ва Украіне

• 13.01.2026, 21:42

Расія штомесяц губляе 25 тысяч чалавек.

Расія падчас наступу на Украіну штомесяц губляе да 25 тысяч чалавек, заявіў генеральны сакратар НАТА Марк Рютэ. Паводле яго слоў, ідзе пра забітых расійскіх вайскоўцаў.

«На дадзены момант Расія губляе велізарную колькасць салдат з-за трывалай абароны Украіны. За адзін месяц гэта ад 20 000 да 25 000 забітых расійскіх салдат. Я кажу не пра цяжкапараненых, а пра забітых. Калі параўнаць гэта з вайной у Афганістане ў 1980-х гадах, дзе яны страцілі каля 20 000 салдат за 10 гадоў, — кантраст разючны. Цяпер яны страчваюць столькі ж — і нават больш — усяго за адзін месяц», — сказаў Рютэ на канферэнцыі «Глабальная Еўропа».

Зыходзячы са слоў генсака НАТА, РФ толькі за 2025 год магла страціць ва Украіне забітымі 300 тысяч чалавек, а калі спраецыраваць гэтыя даныя на амаль чатыры гады вайны, то гэта 1,2 млн загінулых на фронце расіян.

Між тым, паводле ацэнак НАТА, сукупныя страты расійскіх войскаў на «СВА», якая па працягласці ўжо пераўзыйшла Вялікую Айчынную вайну, забітымі і параненымі на снежань 2025 года склалі 1,15 млн чалавек. Сярод параненых, паводле падлікаў, прыкладна 400 тысяч чалавек сталі інвалідамі, што супастаўна з насельніцтвам Бранска або Цверы.

У снежні старшы навуковы супрацоўнік Carnegie Endowment Майкл Кофман ацэньваў непапраўныя штомесячныя страты Расіі ў 25 тысяч чалавек, адзначаючы, што Масква з цяперашнім тэмпам набору ў 30–35 тысяч кантрактнікаў у месяц здольная толькі папаўняць асабовы склад, а не назапашваць сілы для новых прарываў.

Рютэ таксама падкрэсліў, што Масква не дэманструе ніякіх прыкмет змякчэння сваёй пазіцыі адносна НАТА. «Няма падстаў меркаваць, што Расія ў бліжэйшы час зменіць агрэсіўны і безразважны спосаб дзеянняў. Наадварот, яна імкнецца да доўгатэрміновай канфрантацыі», — заявіў ён.

Рютэ дадаў, што РФ для дасягнення гэтай мэты ўзаемадзейнічае з Кітаем, Іранам і Паўночнай Карэяй. Паводле кіраўніка Паўночнаатлантычнага альянсу, гэтыя чатыры краіны «ўсё актыўней супрацоўнічаюць, каб кінуць выклік НАТА», але ў блоку «ёсць перавага» — гэта шматгадовае партнёрства паміж дзяржавамі — сябрамі арганізацыі.