ЗША перамяшчаюць авіяносную ўдарную групу з Азіі на Блізкі Усход

• 15.01.2026, 9:33

На тле ўзмацнення напружанасці паміж адміністрацыяй Трампа і рэжымам у Іране.

ЗША пачалі перамяшчэнне авіяноснай ударнай групы з Паўднёва-Кітайскага мора ў зону адказнасці Цэнтральнага камандавання ЗША на Блізкім Усходзе, паведамляе NewsNation са спасылкай на ўласныя крыніцы.

У матэрыяле гаворыцца, што на тле ўзмацнення напружанасці паміж адміністрацыяй прэзідэнта ЗША Дональда Трампа і рэжымам Ірана Пентагон перамяшчае авіяносную ўдарную групу з Паўднёва-Кітайскага мора ў зону адказнасці Цэнтральнага камандавання ЗША, якая ўключае Блізкі Усход.

Субяседнік журналістаў распавёў, што гаворка ідзе пра ўдарную групу авіяносца «Авраам Лінкальн», у склад якой таксама ўваходзіць некалькі іншых баявых караблёў і прынамсі адна ўдарная падводная лодка.

Чакаецца, што гэты працэс працягнецца каля тыдня.

14 студзеня агенцтва Reuters са спасылкай на крыніцы паведаміла, што ўмяшанне ЗША ў сітуацыю ў Іране верагоднае і можа адбыцца на працягу 24 гадзін.