Пуцін не наважыўся раскрытыкаваць Трампа за звяржэнне Мадура і захоп расійскіх танкераў
- 15.01.2026, 20:54
Дыктатар РФ працягвае маўчаць.
Дыктатар РФ Уладзімір Пуцін працягвае маўчаць у сувязі з дзеяннямі ЗША ў Венесуэле, з якой Расія звязаная дамовай аб «стратэгічным усёабдымным» партнёрстве і ў якую за апошнія два дзесяцігоддзі ўклала амаль $20 млрд, паведамляе The Moscow Times.
Падчас першага публічнага выступлення пасля навагодніх канікул, на цырымоніі ўручэння верадыверчых грамат замежным паслам у Крамлі, Пуцін не прамовіў ні слова пра захоп амерыканскімі вайскоўцамі Нікаласа Мадура, з якім за апошнія паўтара года ён двойчы сустракаўся (у маі 2025 года і ў кастрычніку 2024-га), называючы Венесуэлу «сябрам» і «надзейным партнёрам» Расіі.
Пуцін таксама прамаўчаў пра затрыманні танкераў расійскага ценявога флоту, якія выкарыстоўваліся для перавозкі венесуэльскай нафты. Ні слова пра Венесуэлу не сказаў падчас першага паслянавагодняга брыфінгу ў чацвер прэс-сакратар Крамля Дзмітрый Пяскоў.
Звяртаючыся да паслоў, Пуцін заявіў, што сітуацыя на міжнароднай арэне «ўсё больш і больш дэградуе». «Пошук кансэнсусу і кампрамісных рашэнняў усё часцей падмяняюцца аднабаковымі, пры гэтым даволі небяспечнымі дзеяннямі. І замест дыялогу паміж дзяржавамі гучыць маналог тых, хто па праве сілы лічыць дапушчальным дыктаваць сваю волю, вучыць жыццю і аддаваць загады», — сказаў ён.
Аперацыя супраць Мадура, якому ў ЗША пагражае пажыццёвае зняволенне па абвінавачаннях у арганізацыі наркагандлю, раззлавала Маскву, але адносіны з Вашынгтонам для Крамля важнейшыя, паведаміла Bloomberg крыніца, знаёмая з сітуацыяй.
Паводле яго слоў, страту сяброўскага рэжыму ў Венесуэле ў Крамлі не лічаць катастрофай. Значна сур'ёзней, падкрэсліваў суразмоўца Bloomberg, сітуацыя з Іранам, якому Трамп пагражаў ударамі дзеля падтрымкі пратэстоўцаў супраць улады аятол. Іран з'яўляецца буйным ваенным партнёрам Расіі і з пачатку вайны ва Украіне паставіў ракет і дронаў на $3 млрд. Але, нягледзячы на гэта, Расія наўрад ці будзе ўмешвацца і, хутчэй за ўсё, абмежуецца выказваннем публічнай падтрымкі, казаў суразмоўца агенцтва.