БПЛА атакавалі марскі порт у Краснадарскім краі РФ: гараць тэрміналы

• 22.01.2026, 8:17

Пашкоджаныя чатыры рэзервуары з нафтапрадуктамі.

У ноч на 22 студзеня ўдарныя беспілотнікі атакавалі марскі порт «Тамань», размешчаны ў пасёлку Вална Краснадарскага краю РФ, піша «Фокус».

Пад удар трапілі партавыя тэрміналы, паведаміў губернатар рэгіёна Веніямін Кандрацьеў.

«Цяпер на тэрыторыі тэрміналаў — пажар, загарэліся чатыры рэзервуары з нафтапрадуктамі», — напісаў Кандрацьеў.

Пазней у Аператыўным штабе Краснадарскага краю ўдакладнілі, што ў выніку атакі дронаў загінулі трое чалавек, яшчэ васьмёра — пацярпелі.

«Усе пацярпелыя шпіталізаваныя з рознымі траўмамі сярэдняй ступені цяжкасці. Лекары аказваюць неабходную медыцынскую дапамогу», — адзначылі ў аперштабе.

У той жа час тэлеграм-канал «Supernova+» апублікаваў відэа, на якім зафіксаваны момант удару БПЛА па марскім порце.

На момант публікацыі матэрыялу ўкраінскі бок не каментаваў атакі дронаў на порт «Тамань» у пасёлку Вална.