Санкцыі ЕС супраць беларускага калію будуць падоўжаныя

• 22.01.2026, 12:08

Літва адхіліла ідэі пра аднаўленне калійнага транзіту.

Дыскусіі па пытанні перавозкі беларускіх калійных угнаенняў праз Еўрапейскі саюз не вядуцца, заявіў 22 студзеня ў эфіры Žinių radijas міністр замежных спраў Літвы Кястуціс Будрыс.

Чыноўнік, словы якога прыводзіць партал LRT, выказаўся з гэтай нагоды, каментуючы заяву еўрадэпутата, ганаровага старшыні сацыял-дэмакратаў Вітэніса Повіласа Андрюкайціса аб тым, што транзіт беларускага калію праз Літву мог бы быць адноўлены ў абмен на магчымасць перавозіць украінскія грузы ў порт Клайпеды праз тэрыторыю Беларусі.

«Тут вельмі важны кантэкст — у мяне адразу ўзнікла б пытанне: калі і на якіх умовах, — адрэагаваў Будрыс. — Зараз мяжа Украіны і Беларусі наглуха закрытая, там ніхто нікуды не ездзіць, таму, верагодна, ідзе гаворка пра ўмовы пасля мірнага пагаднення і калі не будзе санкцый. Зараз гэтага нельга рабіць ужо хаця б з юрыдычнага пункту гледжання, бо санкцыі Еўрапейскага саюза дзейнічаюць, іх падаўжэнне цяпер абмяркоўваецца».

«Вельмі верагодна, што пасля 28 лютага іх працягнуць, таму такіх умоў нават няма, і разгляд такіх сцэнароў з’яўляецца даволі гіпатэтычным», — дадаў кіраўнік літоўскай дыпламатыі.

У інтэрв’ю агенцтву BNS, апублікаваным 12 студзеня, прэзідэнт Літвы Гітанас Наўседа заявіў, што мае намер прадстаўляць «цвёрдую пазіцыю» сваёй краіны, калі Вільнюс сутыкнецца з ціскам, накіраваным на аднаўленне транзіту беларускіх угнаенняў.

Паводле яго слоў, любыя разважанні пра тое, што Вільнюс мог бы «нешта прадаць у абмен на больш гнуткую пазіцыю ў пытанні беларускіх угнаенняў», з’яўляюцца прынцыпова непрымальнымі. Наўседа падкрэсліў, што такую ж палітыку праводзіць і Еўрапейскі саюз.

Літва забараніла транзіт беларускіх угнаенняў на пачатку 2022 года, абапіраючыся на санкцыі Злучаных Штатаў Амерыкі, паколькі ЕС увёў адпаведныя абмежаванні пазней.