Пратэстуючы іранец расказаў, чаму яго народ вельмі добра разумее беларусаў

• 22.01.2026, 15:11

У абедзвюх краін — свабодная будучыня.

21 студзеня іранцы, якія жывуць у Вільнюсе, прыйшлі да пасольства ЗША, каб нагадаць пра тое, што цяпер адбываецца на іх радзіме. Адзін з удзельнікаў акцыі, Энаят, расказаў Telegram-каналу «Баста!» пра яе мэты:

«Мы не можам атрымаць ніякай інфармацыі ад сем'яў і сваякоў, і мы вельмі гэтым занепакоеныя. Мы ведаем, што тысячы людзей былі забітыя, і яшчэ мноства ахвяр ва ўсіх гарадах.

Мы тут, каб быць голасам іранскага народа, які быў вымушаны маўчаць. У Іране адбылася разня, і яна працягваецца дагэтуль. Таму мы павінны стаць іх голасам і паказаць свету жорсткасць гэтага рэжыму.

Дональд Трамп спачатку паабяцаў іранцам дапамогу, калі яны выйдуць на вуліцы, людзі выйшлі, шмат людзей было забіта, і цяпер мы чакаем яго адказу, каб падтрымаць іранскі народ.

Вельмі шмат агульнага паміж рэжымамі ў Беларусі і Іране, а таксама ў некаторых іншых краінах, такіх як Венесуэла, дзе нядаўна быў скінуты Мадура. Мы разумеем пачуцці адно аднаго, пачуцці прыгнечаных. Беларусь, як і іншыя краіны, зможа мець свабодны ўрад і выбіраць сваю ўладу, сваіх лідараў».