Apple выдаліла прыкладанні «Белгазпромбанка»

• 22.01.2026, 16:30

Мабільныя сэрвісы банка сталі недаступныя для спампоўвання ў AppStore.

Прыкладанні «Белгазпромбанка» DailyFin, BGPB mobile і BGPB Business сталі недаступныя для спампоўвання ў AppStore. Пра гэта папярэдзіла прэс-служба фінустановы.

У банку адзначылі, што гэта адбылося «па прычынах, не залежных ад Белгазпромбанка».

Раней усталяваныя прыкладанні DailyFin, BGPB mobile, BGPB Business працягнуць працаваць у звыклым рэжыме. Банк параіў іх не выдаляць і ўключыць дасылку апавяшчэнняў аб аперацыях па картках на электронную пошту.

Уся гісторыя аперацый і новыя паведамленні будуць даступныя ў прыкладанні, як і раней.

«Каманда Белгазпромбанка працуе над аператыўным вырашэннем дадзенай сітуацыі. Хутка мы вернемся да вас з альтэрнатыўнымі варыянтамі і падказкамі адносна далейшага зручнага карыстання нашымі мабільнымі прыкладаннямі», — запэўнілі ў фінустанове.