Расійскія страты ў месяц дасягнулі рэкордных 35 тысяч салдат

• 22.01.2026, 19:50

Лічбу агучыў прэзідэнт Украіны.

Страты Расіі за год выраслі з 14 тысяч да 35 тысяч забітых у месяц, паведаміў прэзідэнт Украіны Уладзімір Зяленскі у чацвер, 22 студзеня, на эканамічным форуме ў Давосе.

«Расійскія страты — самыя вялікія з усіх, што ў іх калі-небудзь былі. Таму я проста дзялюся з вамі рэальнай статыстыкай, а яна — 35 тысяч забітых у месяц, 35 тысяч салдат. Летась у гэты месяц гэта было каля 14 тысяч», — сказаў Зяленскі.

Паводле яго слоў, Расія штомесяц мабілізуе 40–43 тысячы чалавек, аднак ужо пачала страчваць 45 тысяч.

«З гэтых 43 тыс. вы павінны ведаць, што прыкладна 10–15% уцякаюць, і ёсць пэўная колькасць параненых… Вы можаце зразумець, што іхняя армія перастала павялічвацца з-за нашых тэхналогій дронаў і нашых аператараў дронаў», — адзначыў прэзідэнт.