Знойдзены суперкар Ferrari 80-х з прабегам 1400 кіламетраў

• 24.01.2026, 14:27

Пра аўто забылі на 28 гадоў у сараі.

Суперкар Ferrari 328 GTB не эксплуатаваўся з 1998 года, а яго прабег складае ўсяго 1434 км. Пра знаходку распавялі на YouTube-канале Anglia Car Auctions.

Удалося ўстанавіць, што аўтамабіль меў двух уладальнікаў. Апошні ўладальнік набыў яго ў 1991 годзе і мала карыстаўся ім, а праз 7 гадоў пакінуў пад чахлом у сараі.

Пасля смерці брытанца пра Ferrari 328 GTB забыліся, таму аўтамабіль прастаяў сярод купаў хламу да нашых дзён. Ён нядрэнна захаваўся: кузаў і салон у добрым стане.

Праўда, суперкар Ferrari 328 GTB не заводзіцца, і нават яго колы не круцяцца. Каб зрушыць яго з месца, спатрэбіўся эвакуатар з лябёдкай. Аўтамабіль плануюць аднавіць.

Гэта мадэль апошняга года выпуску ў нядрэннай камплектацыі — са скураным аздабленнем сядзенняў і пярэдняй панэлі, кандыцыянерам і ABS.

Купэ Ferrari 328 GTB абсталявана 3,2-літровым V8 магутнасцю 270 к. с. Яно здольнае разганяцца да 100 км/г за 6,4 с і развіваць 263 км/г. Усяго з 1984 па 1989 год выпушчана 7412 такіх аўто.