Журналісты указалі на параною Крамля

• 28.01.2026, 13:51

Пуцін баіцца простых расіян.

Расіян, якіх раней дапускалі да ўдзелу ў цырымоніі ўскладання Пуціным кветак да манумента «Маці-Радзіма» на Піскароўскіх мемарыяльных могілках, гэтым разам у крамлёўскай хроніцы не было. У мінулым годзе іх адсунулі ад расійскага кіраўніка, заўважыла «Агенцтва».

Відэа традыцыйнага ўскладання кветак у дзень заканчэння блакады Ленінграда на могілках у Санкт-Пецярбургу апублікаваў Крамль. На ім відаць, што гэтым разам у цырымоніі не было глядачоў: у ёй удзельнічалі толькі вайскоўцы і чыноўнікі.

Глядачоў адсунулі далей ад прэзідэнта ў мінулым годзе. Калі ў 2024 годзе падчас ускладання кветак Пуціным яны стаялі на бакавой дарожцы цэнтральнай алеі, то ў 2025 годзе іх перамясцілі на адну з алеяў паміж брацкімі магіламі. Такім чынам, адлегласць паміж прэзідэнтам і людзьмі за год павялічылася больш чым у тры разы — прыблізна з 10 метраў да 35.

На кадрах, дзе дыктатар ідзе па цэнтральнай алеі, таксама не відаць глядачоў. У мінулым годзе Пуцін, ідучы па алеі, махаў ім рукой.