Пад Мінскам заўважылі «Бэтмабіль»

• 30.01.2026, 19:43

Фотафакт.

У сацыяльных сетках з’явілася відэа з мытні пад Мінскам, дзе на пляцоўцы «Белтаможсэрвіс» заўважылі сапраўдны Бэтмабіль. Паводле відавочцаў, незвычайны аўтамабіль толькі што выгрузілі з кантэйнера, а паглядзець на яго збеглася ці не палова супрацоўнікаў склада часовага захоўвання, піша выданне abw.by.

Як мяркуюць аўтааматары, хутчэй за ўсё, гэта не арыгінал з кіно, а рэпліка, зробленая на базе Chevrolet Corvette 1980‑х гадоў.

Нягледзячы на гэта, з’яўленне такога аўтамабіля ў Беларусі стала нечаканасцю і выклікала вялікую цікавасць. Шмат хто лічыць, што Бэтмабіль не затрымаецца ў Мінску і хутка паедзе далей — гэта актыўна абмяркоўваюць у каментарыях да відэа, апублікаванага кампаніяй sevmotors.by.

Выданне «АўтаГродна» нагадвае, што ў кінагісторыі пра Бэтмена было некалькі розных Бэтмабіляў. Той, які заўважылі ў Беларусі, падобны на аўтамабіль з фільмаў Ціма Бёртана «Бэтмен» (1989) і «Бэтмен вяртаецца» (1992). Гэты варыянт вызначаўся доўгім, нізкім і абцякальным кузавам і быў пабудаваны на шасі Chevrolet Impala. Яго задняя частка нагадвае канцэпт‑кар Fiat Turbina 1950‑х гадоў.

Падобны Бэтмабіль летась прадаваўся на амерыканскім аўкцыёне Mecum. Ён быў абсталяваны 5,7‑літровым васьміцыліндравым рухавіком і аўтаматычнай каробкай перадач.

Відэа з мінскай мытні сабрала сотні жартлівых каментароў. Карыстальнікі пісалі, што Бэтмен прыехаў дапамагаць чысціць снег, што ў Беларусі настолькі спакойна, што нават супергероі сюды заязджаюць, або што зімовыя дарогі могуць прымусіць яго хутка разгарнуцца і з’ехаць. Іншыя жартуюць пра вечарынку, здымкі новага фільма або нават пра «беларускага Бэтмена».