«Гэта сцэнар 11 верасня»: другі пілот самалёта Flydubai планаваў урэзацца ў хмарачос

• 1.10.2026, 9:36

Ізраільскія спецслужбы агучылі сваю версію.

Ізраільскія спецслужбы лічаць, што другі пілот самалёта Flydubai, які ляцеў з ААЭ ў Ізраіль, спрабаваў захапіць кіраванне, каб накіраваць лайнэр у хмарачос у Тэль-Авіве. Пра гэта The Telegraph паведамілі тры інфармаваныя крыніцы. «Лічыцца, што гэта сцэнар, падобны да 11 верасня, калі другі пілот забівае пілота і разбівае самалёт на тэрыторыі Ізраіля разам з усімі пасажырамі, большасць якіх — ізраільцяне», — сказаў адзін з іх.

Самалёт раніцай 30 верасня здзейсніў экстраную пасадку ў Саудаўскай Аравіі пасля нападу другога пілота на капітана. Падчас інцыдэнту другі пілот некалькі разоў ударыў калегу кішэнным нажом, пасля чаго лайнэр пачаў рэзка зніжацца. За 37 секунд самалёт страціў каля 4,6 тыс. метраў вышыні і падаў сігнал пра «незаконнае ўмяшанне», які звычайна выкарыстоўваецца пры захопе самалёта.

Пасажыр Яніў Хаюн распавёў The Telegraph, што падчас здарэння ён уварваўся ў кабіну і ўбачыў другога пілота, які кіраваў самалётам. «Я схапіў тэрарыста, ужыў прыём і найперш выцягнуў яго вонкі», — распавёў ён. Пасля гэтага Хаюн на пэўны час сам узяў кіраванне самалётам. Потым штурвал перахапілі два іншыя пілоты, якія знаходзіліся на борце, і пасадзілі лайнэр у саудаўскім Табуке.

Ізраільскі прэм'ер-міністр Біньямін Нэтаньягу заявіў, што расследуецца змова з мэтай «разбіць самалёт разам з усімі, хто знаходзіўся на борце». Пры гэтым ён не стаў наўпрост называць тое, што адбылося, тэрактам. Міністр абароны Ізраіля Ісраэль Кац назваў інцыдэнт «спробай джыхадысцкага нападу».

Пасля прызямлення самалёта ўлады Саудаўскай Аравіі арыштавалі другога пілота. Ён, меркавана, з'яўляецца грамадзянінам Омана. Яго асоба, матывы і намеры пакуль афіцыйна не пацверджаныя.

Авіякампанія Flydubai заявіла, што матыў здарэння расследуецца, і заклікала не рабіць «прадчасовых высноваў».