Абвінавачанага ў забойстве Фарыён прысудзілі да пажыццёвага зняволення

• 1.10.2026, 16:00

Праз больш як два гады суд вынес прысуд.

Шаўчэнкаўскі раённы суд Львава агаласіў прысуд Вячаславу Зінчэнку, абвінавачанаму ў забойстве ўкраінскай актывісткі Ірыны Фарыён. Яго прызналі вінаватым у наўмысным забойстве асобы ў сувязі з выкананнем грамадскага доўгу, учыненым з матываў нацыянальнай нецярпімасці, а таксама ў незаконным валоданні агнястрэльнай зброяй, і прысудзілі да пажыццёвага зняволення, паведамляе New Voice.

Акрамя таго, суд абавязаў Зінчэнку выплаціць пяць мільёнаў грыўняў як кампенсацыю маральнай шкоды дачцэ Ірыны Фарыён — Сафіі Асобе.

Падчас агалошвання прысуду суддзя адзначыў, што абвінавачанаму неаднаразова прапаноўвалі выступіць падчас судовых прэнняў, аднак ён адмаўляўся праз неўзгодненасць пазіцыі з абаронцамі.

25 ліпеня 2024 года ў Дняпры затрымалі Вячаслава Зінчэнку, падазраванага ў забойстве былой народнай дэпутаткі ад ВО «Свобода», публіцысткі і лінгвісткі Ірыны Фарыён, якая памерла ў Льваве пасля таго, як 19 ліпеня ў яе стрэлілі.