Германія створыць свой першы палк беспілотнікаў

• 1.10.2026, 22:28

Падраздзяленне будзе мець на ўзбраенні дроны з далёкасцю палёту да 500 кіламетраў.

У шэрагах Узброеных Сіл Германіі плануецца стварыць першы палк беспілотнікаў.

Пра гэта заявіў міністр абароны Германіі Барыс Пісторыус, якога цытуе dpa.

Паводле слоў міністра, падраздзяленне будзе складацца з 600 чалавек і мець на ўзбраенні дроны з далёкасцю палёту да 500 кіламетраў.

«Хто хоча атрымаць перавагу на сушы, той павінен авалодаць вядзеннем бою з дапамогай беспілотных сістэм», — падкрэсліў Пісторыус.

Новае падраздзяленне будзе мець задачу «аб’яднаць магчымасці і набраць тэмп», — дадаў ён.

Ідзе гаворка не толькі пра лятальныя сістэмы, але і пра беспілотныя наземныя сістэмы, удакладніў кіраўнік нямецкага абароннага ведамства.

«Палк будзе ахопліваць далёкасці ад блізкай да 500 кіламетраў, і вырашальным з’яўляецца тое, што палк павінен мець уласную роту радыёэлектроннай барацьбы», — адзначыў Пісторыус.