Трамп: я павінен быў атрымаць восем Нобелеўскіх прэмій міру, а не адну

• 10.10.2026, 11:38

Прэзідэнт ЗША зноў абурыўся тым, што прэмію ўручылі не яму.

Прэзідэнт ЗША Дональд Трамп заявіў, што «ніхто ніколі не чуў» пра лаўрэатку Нобелеўскай прэміі міру Наванетхем «Наві» Пілэй і што яна нічога не зрабіла, каб атрымаць прэмію, у адрозненне ад яго. Пра гэта Трамп напісаў у сацсетцы Truth Social.

«Менавіта гэтая жанчына атрымала Нобелеўскую прэмію міру замест вялікай краіны — Злучаных Штатаў Амерыкі, прадстаўніком якіх з’яўляюся я, і якая ўрэгулявала восем войнаў, а таксама зрабіла многае іншае. Я нічога не ведаю пра гэтую жанчыну, як, дарэчы, і ніхто іншы! Насамрэч, наколькі мне вядома, ніхто ніколі пра яе не чуў, за выключэннем таго факта, што яна, відавочна, нянавідзіць Ізраіль. Я не ведаю, што зрабіла гэтая жанчына», — заявіў Трамп.

Ён адзначыў, што ў Нарвежскі Нобелеўскі камітэт былі накіраваныя лісты «ад кожнага прэзідэнта і прэм’ер-міністра тых краін», якім ён дапамог.

«І цяпер я блізкі да ўрэгулявання або перамогі яшчэ ў двух канфліктах — з Іранам і паміж Расіяй і Украінай. Абодва працэсы ідуць з галавакружальнай хуткасцю, але забудзьцеся пра іх: гаворка пра восем войнаў, якія я ўжо ўрэгуляваў. Любы з гэтых канфліктаў, асабліва паміж Пакістанам і Індыяй, сам па сабе быў бы больш чым дастатковай падставай для прысуджэння мне Нобелеўскай прэміі міру. Па сутнасці, я павінен быў атрымаць восем Нобелеўскіх прэмій міру, а не адну», — заявіў амерыканскі лідар.

Трамп дадаў, што Нобелеўская прэмія міру «назаўсёды дыскрэдытаваная».

Напярэдадні Нобелеўскую прэмію міру ўручылі вядомай паўднёваафрыканскай юрыстцы, суддзі і праваабаронцы Наванетхем Наві Пілэй. Яна атрымала міжнароднае прызнанне дзякуючы сваёй шматгадовай барацьбе за правы чалавека.

Праз некалькі гадзін пасля таго, як Пілэй атрымала Нобелеўскую прэмію міру, адміністрацыя прэзідэнта ЗША Дональда Трампа 9 кастрычніка ўвяла санкцыі супраць Міжнароднага крымінальнага суда (МКС), дзе яна калісьці працавала.