Трамп заявіў, што не жадае весці перамовы з Зяленскім аб завяршэнні вайны

• 16.10.2026, 8:59

Ці перамогуць дэмакраты на выбарах у Кангрэс ЗША?

Прэзідэнт ЗША Дональд Трамп заявіў, што не хоча мець справу з украінскім лідарам Уладзімірам Зяленскім, паколькі той, на яго думку, не жадае дамаўляцца з Расіяй аб завяршэнні вайны. «Зяленскі — не той чалавек, з якім нам варта мець справу. Ён не хоча дамаўляцца. Ён кажа, што хоча дамовіцца, але гэта не так. Не, я не вялікі прыхільнік Зяленскага», — сказаў Трамп у інтэрв’ю тэлеканалу Newsmax.

Таксама кіраўнік Белага дома выказаў незадаволенасць тым, што Украіна узнавіла ўдары па расійскіх нафтаперапрацоўчых заводах (НПЗ). Паводле яго слоў, з-за гэтага растуць сусветныя цэны на нафту. «Калі вы наносіце ўдары па заводах, што вырабляюць дызельнае паліва, якое патрэбна нам і ўсяму свету, вы аказваеце свету дрэнную паслугу. Я лічу, што гэта проста ганьба», — сказаў Трамп. Падчас інтэрв’ю ён таксама прызнаў, што яму складаней мець справу з Зяленскім, чым з Уладзімірам Пуціным.

Тыднем раней Трамп заявіў, што Украіне неабходна знайсці новага прэзідэнта, які здолее «заключыць здзелку» з Расіяй. «Ён [Зяленскі] змог бы заключыць шмат здзелак, але чамусьці ніколі гэтага не робіць. <�…> Думаю, Украіне пара абраць новага прэзідэнта», — сказаў кіраўнік Белага дома.

Пасля гэтага ўкраінскі лідар заявіў пра гатоўнасць правесці выбары прэзідэнта, калі Расія пагодзіцца на два месяцы поўнага спынення агню. Паводле яго слоў, такі тэрмін неабходны для забеспячэння бяспекі кампаніі.

Эксперты прагназуюць паразу Рэспубліканскай партыі на выбарах у Кангрэс 3 лістапада. Многія рэспубліканцы ўжо цяпер дыстанцуюцца ад Трампа ў сувязі з яго дзеяннямі і заявамі.