У Беларусі забаранілі расійскі крэм для нованароджаных

• 16.10.2026, 10:12

У ім выявілі недапушчальны для такой касметыкі кансервант.

Уведзена часовая забарона на ўвоз і продаж расійскага дзіцячага ўвільгатняльнага крэму Bambolina, прызначанага для выкарыстання з самага нараджэння, паведаміў Дзяржстандарт.

На ўпакоўцы ўвільгатняльнага крэму Bambolina ёсць маркіроўка 0+, гэта значыць ён прызначаны для дзяцей з самага нараджэння.

Аднак высветлілася, што прадукт не адпавядае тэхнічным патрабаванням: у ім ёсць кансервант метылізатыязалінон, які дазваляецца выкарыстоўваць толькі ў змыўнай прадукцыі.

Вытворца крэму — расійская кампанія «Арбіта СП» з Кірава. Пастаўшчык у Беларусь — віцебская «ЕўраСмокТрэйд».

З 16 кастрычніка ў Беларусі дзейнічае часовая забарона на ўвоз і рэалізацыю гэтага крэму.