У Брэсце мужчына спрабаваў заскочыць у адыходзячы цягнік

• 16.10.2026, 12:54

Кінавы трук не ўдаўся.

На чыгуначным вакзале ў Брэсце адбыўся нечаканы інцыдэнт. 53-гадовы мужчына спазняўся, таму паспрабаваў дагнаць цягнік, што ўжо адыходзіў. Калі склад ужо пачаў рухацца, пасажыр вырашыў рызыкнуць і паспрабаваў заскочыць у вагон на хаду. Чым усё скончылася, расказалі ў Дзяржаўным камітэце судовых экспертыз.

Утрымацца за парэнчу мужчыну не ўдалося. Ён сарваўся і ўпаў у прамежак паміж перонам і пуцямі. З траўмамі яго даставілі ў бальніцу. Эксперты выявілі закрыты аскольчаты пералом прамянёвай косці са зрушэннем, яго кваліфікавалі як менш цяжкае пашкоджанне.

Спецыялісты нагадалі пра правілы бяспекі каля чыгуначных пуцей. У іх практыцы сустракаліся выпадкі з цяжкім зыходам пры спробах перайсці пуці перад цягніком, які набліжаецца, праехацца звонку вагона або зрабіць сэлфі на даху вагона.