Фаварытка гонкі за пасаду генералнага сакратара ААН абяцае скалануць арганізацыю

• 16.10.2026, 13:18

Прыярытэты — актыўная пасярэдніцкая роля і скарачэнне бюракратыі.

Рэбэка Грынспан, адна з галоўных прэтэндэнтак на пасаду генеральнага сакратара ААН, заявіла, што арганізацыя стала занадта асцярожнай і мае патрэбу ў рэформе. У інтэрв'ю Reuters яна падкрэсліла, што кіраўнікі ААН павінны быць гатовыя да няўдач і не баяцца спрабаваць зноў (пераклад — сайт Charter97.org).

Грынспан выступае за больш актыўную пасярэдніцкую дыпламатыю і прадухіленне канфліктаў. Як прыклад яна прывяла Чарнаморскую збожжавую ініцыятыву, якая дазволіла аднавіць экспарт украінскага збожжа падчас вайны.

«Кіраўнік павінен прымаць цану няўдач і спрабаваць зноў», — заявіла кандыдатка, якая выступае за больш ініцыятыўную ролю ААН у міжнародных крызісах.

Яшчэ адным прыярытэтам Грынспан назвала скарачэнне бюракратыі. На яе думку, арганізацыі варта ліквідаваць дубляванне функцый і перанакіроўваць рэсурсы на ключавыя задачы, а не проста скарачаць выдаткі. Кіруючы ЮНКТАД — Канферэнцыяй ААН па гандлі і развіцці, — яна скараціла колькасць штатных адзінак прыкладна на 20%.

Грынспан таксама заклікае перагледзець падыход да міратворчых аперацый і шукаць альтэрнатывы традыцыйным місіям, у тым ліку пры вырашэнні крызісу на Гаіці. Пры гэтым яна лічыць неабходным падтрымліваць цесны дыялог з пяццю пастаяннымі членамі Рады Бяспекі.

У пятніцу Рада Бяспекі праводзіць чарговае папярэдняе апытанне кандыдатаў на змену Антоніу Гутэрышу. Грынспан лідаравала ў чатырох з пяці папярэдніх раундаў і атрымала дзевяць галасоў падтрымкі. Для афіцыйнага вылучэння неабходныя як мінімум дзевяць галасоў і адсутнасць вета з боку пастаянных членаў Рады.

Пры гэтым Грынспан чакае з’яўлення новых супернікаў. «Гульня яшчэ не скончана», — падкрэсліла яна.