Балгарыя папрасіла ў НАТА ўвесь магчымы спектр сістэм супраць дронаў

• 16.10.2026, 14:20

На фоне ўсё больш частых атак на судны ў Чорным моры.

Балгарыя звярнулася да НАТА з просьбай прадаставіць баявую авіяцыю, ракетныя комплексы і сістэмы супрацьдзеяння дронам на фоне ўсё больш частых атак на судны ў Чорным моры.

Аб гэтым, як піша Nova, паведаміў міністр абароны Балгарыі Дзмітар Стоянаў.

Балгарскі чыноўнік папярэдзіў, што сітуацыя ў Чорнаморскім рэгіёне становіцца ўсё больш напружанай. Паводле яго слоў, інтэнсіўнасць атак расце, а нядаўнія інцыдэнты паблізу тэрыторыі краін-саюзніц сведчаць пра неабходнасць паскоранай мадэрнізацыі балгарскай арміі.

«Мы накіравалі лісты і звароты генеральнаму сакратару НАТА і Вярхоўнаму галоўнакамандуючаму саюзнымі сіламі з заклікам узмацніць нашы магчымасці, што таксама прадугледжвае размяшчэнне дадатковых сіл на нашай тэрыторыі. Мы чакаем іх рашэння. На дадзеным этапе яшчэ не пацверджана, чым менавіта і якім чынам нас будуць узмацняць», – адзначыў Стоянаў.

Адказваючы на пытанне, пра якую канкрэтна дапамогу папрасіла Балгарыя, ён удакладніў, што запыт ахоплівае шырокі спектр ваенных магчымасцяў.

«Мы папрасілі і авіяцыю, і ракетныя комплексы, сістэмы супрацьдзеяння дронам і патрульную авіяцыю. То-бок — увесь магчымы спектр. Вядома, у нашых саюзнікаў абмежаваныя магчымасці. Румынія таксама мае патрэбу ў дадатковых магчымасцях, як і краіны Балтыі», – заявіў Стоянаў.

На гэтым тыдні дроны атакавалі два судны, якія загарэліся каля чорнаморскага ўзбярэжжа Румыніі. У пятніцу Румынія працягнула пошукі 7 маракоў, што зніклі ў выніку атакі.