«Росатом» страчвае кантракты ў Казахстане

• 16.10.2026, 17:44

Супрацоўніцтва з расійскімі структурамі стала занадта рызыкоўным.

Расія страчвае пазіцыі ў уранавай галіне Казахстана, а Кітай умацоўвае кантроль над пастаўкамі стратэгічнай сыравіны. Нацыянальны аператар Рэспублікі Казахстан па імпарце–экспарце ўрану «Казатампром» ухваліў кантракт з кітайскім дзяржаўным пакупніком, але адхіліў амаль ідэнтычную дамову з расійскай карпарацыяй «Росатом», піша The National Interest (пераклад — сайт Charter97.org).

Рашэнне адлюстроўвае змены ў правілах працы замежных кампаній, якія Казахстан увёў напрыканцы 2025 года. Цяпер замежным партнёрам недастаткова проста набываць уран і вывозіць яго за мяжу. Каб атрымаць больш значную долю ў праектах, яны мусяць інвеставаць у перапрацоўку сыравіны на тэрыторыі краіны і перадаваць неабходныя тэхналогіі.

Кітай аказаўся гатовы да такіх умоў. Ён не толькі закупляе ўран, але і укладаецца ў мясцовыя вытворчасці ядзернага паліва. «Росатом», наадварот, сутыкаецца з наступствамі заходніх санкцый, якія зрабілі супрацоўніцтва з расійскімі структурамі камерцыйна рызыкоўным.

«Кампанія, якая будуе вытворчасць у Казахстане, захоўвае сваё месца; тая, што хоча толькі вывезці канцэнтрат, — не», — тлумачыць аўтар логіку новых правілаў.

Для Масквы гэта адчувальны ўдар. З 2009 года Казахстан з’яўляецца найбуйнейшым вытворцам урану ў свеце і забяспечвае каля 40% сусветнага аб’ёму здабычы. Страта новых кантрактаў слабіць расійскія пазіцыі ў стратэгічна важнай галіне, хоць цалкам з казахстанскага атамнага сектара «Росатом» не выцеснены.

ЗША і еўрапейскія краіны таксама рызыкуюць застацца ў прайгрышы. Яны хочуць зменшыць залежнасць ад расійскага ядзернага паліва, але пакуль не прапанавалі Казахстану настолькі ж выгадную мадэль супрацоўніцтва.