У ўладальнікаў электракараў у Беларусі з’явіліся свае негалосныя правілы
- 19.10.2026, 14:24
Аўтааматары на ДВЗ над імі смяюцца.
Не ўсе беларускія аўтааматары засвоілі азы дарожнай культуры, а жыццё падкідвае новыя негалосныя правілы. Гаворка пойдзе пра электракары і зарадныя станцыі. «Куды вы лезяце?» — задае рытарычнае пытанне карыстальнік Threads тым вадзіцелям, якія ставяць сваіх кітайскіх электрычных «малюткаў» на хуткія зарадкі. А што не так? «Онлайнер» паспрабаваў разабрацца.
Спачатку патлумачым для прыхільнікаў ДВЗ: у кожнай мадэлі электракара ёсць свой ліміт на прыём энергіі. Напрыклад, калі станцыя выдае 160 кВт, а бартавы кантролер машыны прымае максімум 60 кВт, хутчэй электракар зараджацца не будзе — якой бы магутнай ні была станцыя. Нядорагія кампактныя мадэлі з батарэямі на 30—45 кВт·гадз у прынцыпе рэдка прымаюць больш за 80 кВт магутнасці.
Зарадныя станцыі таксама бываюць розныя па магутнасці (і хуткасці, з якой ад яе зарадзіцца машына). Ёсць «павольныя», «хуткія», а апошнім часам у Мінску і на трасах актыўна абсталёўваюць і «суперхуткія» зарадкі. Але памятаем: калі машына тэхнічна не можа адначасова прыняць «шмат» энергіі — ніякая суперхуткая станцыя не дапаможа ёй гэта зрабіць.
Некаторыя ўладальнікі дарагіх і «прыёмістых» электракараў злуцца, калі яны прыязджаюць на станцыю і плануюць хутка зарадзіцца і паехаць па сваіх справах, а да яе ў гэты час падлучаны «малютак», якому яшчэ доўга «есці» кілаваты. І вось адзін з крыкаў душы ў Threads:
«Вось растлумачце мне недасведчанаму, навошта займаць ультрахуткія зарадкі на 300 кВт аўтамабілямі, якія могуць прымаць 80—100. Ладна, BYD можа яшчэ і прыме больш за 100, але Geely — куды вы лезяце? Спадзеяцеся: «А раптам прыме?» Побач стаяць 8 зарадкаў на 120 кВт — і ўсе пустыя. Ну як так-то? Што ў нас з культурай?»
І так, сапраўды, апошнім часам на прасторах сацсетак усё часцей абмяркоўваюць негалосныя «правілы культуры», прыдуманыя аднымі ўладальнікамі электракараў для іншых. Вось толькі яны нідзе не прапісаныя, таму нярэдка ўзнікаюць спрэчкі.
«Мая машына не прымае больш за 35 кВт, але калі будзе вольная толькі 350-кВт зарадка, то пастаўлю на яе», — піша карыстальніца ў каментары пад пастом.
«Разумею ваш гнеў, рады, што ў мяне машына можа зараджацца да 380 кВт/г. Больш раздражняюць людзі, якія бачаць чаргу, але ім усё роўна, што машына пасля 80% моцна скідвае хуткасць зарадкі. Будуць чакаць да 100%!» — падымае яшчэ адну праблему іншы карыстальнік.
«Дык прыехаў на зарадку, усе слупкі па 350, але я магу прыняць 50 — значыць, мне ехаць на наступную?» — задаецца пытаннем яшчэ адзін, верагодна, уладальнік электратэхнікі.
Ну а прыхільнікі ДВЗ не могуць прайсці міма без уколаў: «У мяне бензіну «жрэ» 20 літраў на сотню. Бесяць «малалітражкі» і дызелісты, якія не саступаюць чаргу. І запраўляюцца максімум па 20 літраў».
А вы ведалі пра існаванне гэтага негалоснага правіла — што нельга зараджаць «слабенькія» электракары на хуткіх зарадках?