Псіхолагі: усяго 10 хвілін на дзень дапамогуць вярнуць цікавасць да жыцця

• 19.10.2026, 18:46

Жыццялюбства неабавязкова даецца ад прыроды.

Жыццялюбства дапамагае людзям лепш спраўляцца са стрэсам, адчуваць сябе шчаслівей і знаходзіць сэнс у паўсядзённых справах. Гэта якасць можна развіць у любым узросце: псіхолагі раяць рэгулярна займацца фізічнай актыўнасцю, знаходзіць час для задавальненняў і ставіць перад сабой невялікія, але дасягальныя мэты, піша Time (пераклад — сайт Charter97.org).

Псіхолаг Джоан Кук з медыцынскай школы Ельскага ўніверсітэта тлумачыць, што жыццёвы запал, або zest, заключаецца не ў пастаянным узбуджэнні і штучным аптымізме, а ў шчырай цікавасці да жыцця і гатоўнасці актыўна ўдзельнічаць у ім.

Даследаванне, якое аб’яднала даныя 130 навуковых прац з удзелам больш як 275 тысяч чалавек па ўсім свеце, паказала, што жыццялюбства і надзея асабліва цесна звязаныя з псіхалагічным дабрабытам. У асобным даследаванні амаль 10 тысяч працуючых дарослых людзі з высокім узроўнем жыццёвага запалу часцей адчувалі задавальненне ад працы і ўспрымалі яе як прызванне.

Псіхолаг Раян Німец рэкамендуе штодня знаходзіць час для трох рэчаў: прыемнага занятку, фізічнай актыўнасці і справы, якая дае пачуццё дасягнення.

«Трэба зрабіць хаця б адзін крок, каб павысіць уласную энергію», — тлумачыць ён.

Для гэтага можна хадзіць хуткім крокам па дзесяць хвілін раніцай, займацца ёгай, смяяцца з сябрамі або брацца за цікавыя задачы. Пры гэтым людзям, якія адчуваюць хранічны боль або маюць фізічныя абмежаванні, можа спатрэбіцца дапамога спецыяліста.

Жыццялюбства неабавязкова даецца ад прыроды, яго можна паступова развіваць, змяняючы штодзённыя звычкі і стаўленне да таго, што адбываецца.