Пратэсты школьнікаў у Францыі: у Парыжы аблілі бензінам дырэктара школы

• 2.10.2026, 8:53

Да школьнікаў далучыліся і студэнты ВНУ.

Пратэсты школьнікаў у Францыі перараслі ў злачынныя акцыі і ахопліваюць усё больш французскіх гарадоў, піша Бі-бі-сі. У чацвер у Парыжы нападнікі аблілі бензінам дырэктара адной са школ і ўчынілі пажары як мінімум у двух навучальных установах, паведамляе агенцтва Reuters са спасылкай на службовых асоб у мэрыі.

Паліцыя Марсэля паведаміла, што ў чацвер раніцай сотні маладых людзей акружылі пажарную машыну, якая прыбыла тушыць агонь у ліцэі Сэнт-Экзюпэры. Яны прымусілі пажарных пакінуць машыну, пасля чаго падпалілі яе.

У іншым марсэльскім ліцэі (імені Віктара Гюго), паводле дадзеных пракуратуры, дырэктар падвергнуўся нападу і атрымаў траўмы.

Вестыбюль школы ў французскім горадзе Нант на захадзе Францыі цалкам знішчаны пажарам, паведамляюць мясцовыя ўлады.

У Лілі на поўначы краіны навучэнцы ў чацвер збіралі імправізаваныя барыкады з кантэйнераў для смецця і падпальвалі іх.

У Страсбургу пажарныя прыехалі на выклік пасля таго, як побач з адной са школ падпалілі кантэйнеры для смецця. У Дыжоне паліцыя прымяніла для разгону пратэстоўцаў слёзатачывы газ.

Агульнанацыянальныя пратэсты школьнікаў пачаліся мінулага тыдня. Эпіцэнтрам стаў сталічны рэгіён Іль-дэ-Франс.

Школьнікі выйшлі пратэставаць супраць нястачы настаўнікаў, перапоўненых класаў, дрэннага стану школьных будынкаў і вялікай загружанасці вучняў.

Аднак тое, што пачыналася як маладзёжныя дэманстрацыі, перарасло ў вандалізм і жорсткія сутыкненні з паліцыяй, заяўляюць французскія ўлады і абяцаюць жорстка спыняць агрэсію.

Вучні, у сваю чаргу, абвінавачваюць паліцыю ў прымяненні гвалту. Адзін з пратэстоўцаў атрымаў траўму галавы, якую пракуратура звязала з прымяненнем паліцыяй гумовых куль.

За апошнія некалькі дзён да школьнікаў далучыліся і студэнты ВНУ.

Міністр унутраных спраў Францыі Лоран Нуньес паведаміў у інтэрв'ю прэсе, што на дадзены момант затрыманыя 440 чалавек, 76 пратэстоўцаў і 48 супрацоўнікаў праваахоўных органаў атрымалі раненні. Большасць затрыманых — непаўналетнія.

Раней паведамлялася, што затрымана каля тысячы чалавек, але, відаць, большасць з іх неўзабаве адпусцілі.

Паводле звестак Міністэрства адукацыі Францыі, пратэсты або звязаныя з імі збоі ў працы закранулі больш за 400 школ па ўсёй краіне.

Міністр адукацыі Францыі Эдуар Жэфрэ заявіў, што некаторыя патрабаванні вучняў цалкам абгрунтаваныя, аднак яго непакоіць гвалт, які суправаджае пратэсты.

Па яго словах, адзін малады чалавек пашкодзіў кісць падчас запуску піратэхнічнай прылады.

У сераду каля адной са школ у Турэ вучань атрымаў сур'ёзную траўму вока.

У мінулы аўторак пратэсты школьнікаў супалі з дэманстрацыямі работнікаў дзяржаўнага сектара, у тым ліку настаўнікаў і пажарных, якія выступілі супраць запланаванага скарачэння бюджэтных выдаткаў у Францыі.

У чацвер днём канцэлярыя прэм'ер-міністра Сэбасцьена Лекорню правяла тэрмовае пасяджэнне. Пра прынятыя на ім рашэнні пакуль не паведамляецца.

Паводле інфармацыі некаторых крыніц, улады не выключаюць, што маюць справу не са спантаннымі праявамі законнага незадаволення, а з добра скаардынаваным пратэстным рухам.

Аднак афіцыйных заяў на гэты конт пакуль не рабілася.

Тым часам міністр унутраных спраў Лоран Нуньес заявіў, што ў некаторых раёнах правакаратары перамяшчаюцца ад адной школы да іншай, спрабуючы справакаваць беспарадкі.

Міністр адукацыі Эдуар Жэфрэ заклікаў школы пераходзіць на дыстанцыйнае навучанне, калі пратэстоўцы блакуюць будынкі.

«Гвалт не пазбавіць нашых навучэнцаў іх фундаментальнага права на адукацыю», — напісаў ён у X.

Урад прызнаў, што праблемы ў французскіх ліцэях існуюць і патрабуюць вырашэння, але рашуча асудзіў гвалт, які суправаджае пратэстныя акцыі.

Старшыня студэнцкага прафсаюза USL Рыяд Рані абвінаваціў французскі ўрад у «рэпрэсіях», а паліцыю — у празмерным прымяненні сілы.

Адказваючы на пытанні пра дзеянні паліцыі, якія падвергліся крытыцы з боку некаторых палітыкаў, міністр унутраных спраў Лоран Нуньес заявіў, што праваахоўныя органы дзейнічалі «строга суразмерна сітуацыі».

Лідары USL заклікалі правесці 6 кастрычніка маштабную агульнанацыянальную акцыю пратэсту.