У Мінску забаранілі перавозіць дарослыя веласіпеды ў транспарце

• 2.10.2026, 15:37

У «Мінсктрансе» патлумачылі гэта клопатам пра пасажыраў.

Генеральны дырэктар прадпрыемства «Мінсктранс» Канстанцін Галалобаў заявіў, што ў грамадскім транспарце нельга перавозіць дарослыя веласіпеды, і патлумачыў сваю логіку. Інтэрв'ю з ім з'явілася на YouTube-канале minsknews.by.

«Калі мы гаворым пра дзіцячы веласіпед, гэта дазволена. Але калі пасажыр хоча зайсці ў салон з нармальным дарослым веласіпедам, нават матывуючы тым, што цяпер салон пусты і я нібыта нікому не перашкаджаю, усё роўна гэта недапушчальна», — заявіў Галалобаў.

Логіка ў чыноўніка наступная: «На наступным прыпынку зайдуць людзі, і гэты веласіпед ужо камусьці створыць перашкоду. Зачэпіш кагосьці пры ўваходзе, выпацкаеш камусьці адзенне. Каму гэта прыемна? Нікому».

Паводле яго слоў, такія ж патрабаванні прапісаныя для перавозкі хатніх жывёл. «Дробных хатніх жывёл, вядома, можна перавозіць у спецыяльных сумках з выкарыстаннем сарбіруючага дна і гэтак далей. Вялікую сабаку таксама можна перавозіць у намордніку, на павадку, але тады патрабаванні выстаўляюцца і да пасажыра, які суправаджае гэтую сабаку. Гэта адназначна павінен быць паўналетні».

Таксама, гаворачы пра транспарт, Галалобаў паведаміў, што яго прадпрыемства набывае тралейбусы, аўтобусы і трамваі, вырабленыя ў Беларусі. Робіцца стаўка на тое, каб у салоне быў кандыцыянер (цяпер ён ёсць у крыху менш чым 60% машын). З 1 мая па 30 верасня кандыцыянер уключаюць, калі тэмпература навакольнага паветра ад +20°С і вышэй. З кастрычніка па май — калі тэмпература +2°С і ніжэй.

Чыноўнік дадаў, што глабальна развіваць трамвай у сталіцы не плануецца, горад робіць стаўку на развіццё мінскага метрапалітэна.