Трамп адмовіўся абмяркоўваць Украіну на сустрэчы з Пуціным і Сі

• 20.10.2026, 11:17

Прэзідэнт ЗША хоча абмяркоўваць іншыя пытанні.

Прэзідэнт ЗША Дональд Трамп заявіў пра гатоўнасць узяць удзел у трохбаковым саміце з Уладзімірам Пуціным і лідарам Кітая Сі Цзіньпінам, але не дзеля таго, каб абмеркаваць завяршэнне вайны ва Украіне. «Я б гэта зрабіў. Не столькі дзеля Украіны, бо Расія, шчыра кажучы, цалкам нармальна паводзіць сябе ў дачыненні да Украіны. Яна асабліва нічога не робіць. І тое самае з Кітаем», — сказаў Трамп журналістам. Па яго словах, асноўнай тэмай перамоваў могуць стаць ядзерная зброя і раззбраенне.

«Калі прэзідэнт Сі захоча правесці такую сустрэчу, я яе правяду», — дадаў кіраўнік Белага дома.

Да гэтага крыніцы The Wall Street Journal (WSJ) паведамілі, што Пуцін падчас апошняй тэлефоннай размовы прапанаваў Трампу арганізаваць сустрэчу з удзелам кітайскага лідара на палях саміту АТЭС, які пройдзе 18–19 лістапада. Паводле слоў былога супрацоўніка расійскай выведкі, Пуцін бачыць у трохбаковай сустрэчы другую Ялцінскую канферэнцыю, на якой Расія, ЗША і Кітай могуць падзяліць свет на сферы ўплыву. У межах гэтага Пуцін разлічвае дамовіцца пра завяршэнне вайны ва Украіне на сваіх умовах, адзначала WSJ.