Мігранты спрабавалі пранікнуць з Беларусі ў Літву праз трубу

• 20.10.2026, 18:45

У парушальнікаў пры сабе былі нажніцы для металу.

У літоўскім муніцыпалітэце Друскінінкай двое нелегальных мігрантаў з Беларусі спрабавалі пранікнуць у Літву праз вадопрапускную трубу ручая.

Аб гэтым паведамляе LRT са спасылкай на Службу аховы дзяржаўнай мяжы Літвы.

Паводле дадзеных літоўскага памежнага ведамства, двух чалавек, якія наблізіліся з боку Беларусі ў першай палове дня, памежнікі зафіксавалі з дапамогай сістэмы відэаназірання.

Мігранты спрабавалі трапіць у Літву праз трубу дыяметрам каля 2,8 метра, па якой з Беларусі цячэ ручай Кусенка.

Паводле службы, у парушальнікаў пры сабе былі нажніцы для металу, якімі яны, верагодна, намерваліся разрэзаць металічныя вароты, усталяваныя на канцы трубы.

У трубе мігранты прабылі крыху больш за хвіліну, пасля чаго адступілі назад у Беларусь.

У ведамстве не выключаюць, што, убачыўшы трывалыя вароты, мігранты зразумелі, што не змогуць пераадолець іх з дапамогай нажніц, якія мелі пры сабе. Таксама дапускаецца, што яны маглі пачуць гук набліжэння пазадарожнікаў памежнікаў.

Памежнікі, якія прыбылі на месца, агледзелі вароты трубы і запусцілі службовы дрон для праверкі тэрыторыі. Іншых парушэнняў выяўлена не было.

Нагадаем, у ноч з 5 на 6 кастрычніка агрэсіўна настроеныя ўзброеныя мужчыны ў масках спрабавалі пераправіць з Беларусі ў Латвію 20 нелегальных мігрантаў. Асобы, што суправаджалі мігрантаў, пагражалі вайскоўцам, якія не дазволілі ім перасекчы мяжу. Праз некалькі гадзін людзі ў масках праніклі на тэрыторыю Латвіі і пашкодзілі інфраструктуру.