Раскрытыя падрабязнасці новага Ford Ranger

• 21.10.2026, 10:17

Пікапу рыхтуюць замену рухавіка і абнаўленне салона.

Ford гатуе для пікапа Ranger 2027 мадэльнага году новы 3,0-літровы рухавік V6 з падвойным турбанаддувам замест цяперашняга 2,7-літровага агрэгата. Пра гэта сведчыць папярэдняе кіраўніцтва па замове аўтамабіля.

Пра гэта паведамляе выданне Motor1.

У дакуменце 3,0-літровы EcoBoost пазначаны як новая опцыя, а 2,7-літровы V6 — як рухавік, які больш не будзе прапаноўвацца. Афіцыйных характарыстык новага агрэгата кампанія Ford пакуль не абнародавала.

Арыенцірам можа стаць Ford Bronco 2027 мадэльнага году, у якога аналагічны 3,0-літровы V6 развівае 380 к.с. і 597 Нм крутоўнага моманту. Чакаецца, што Ranger атрымае блізкія паказчыкі. Для параўнання: рухавік Ranger Raptor 2026 году развівае 405 к.с. і 583 Нм.

Стандартным для камплектацый XL, XLT і Lariat застанецца 2,3-літровы бензінавы рухавік з турбанаддувам магутнасцю 270 к.с. і крутоўным момантам 420 Нм. Новы V6, як і папярэдні 2,7-літровы агрэгат, будзе прапаноўвацца толькі з поўным прывадам.

Ford Ranger таксама атрымае іншыя абнаўленні. У камплектацыях XLT і Lariat зменяць афармленне рашоткі радыятара, а для ўсёй лінейкі падрыхтуюць новыя варыянты колавых дыскаў. У палітры колераў з'явіцца Neptune Blue замест Velocity Blue, а Carbonized Gray прыбяруць.

Базавая версія Ranger XL будзе абсталяваная мультымедыйным экранам дыяганаллю 12 цаляў замест 10,1 цалі. Двухзонны клімат-кантроль таксама стане стандартным абсталяваннем для гэтай камплектацыі.

Сярод дадатковых опцый з'явіцца пакет Bronze Graphics. Для версій Lariat і Raptor прапануюць новы пакет Luxury з атмасфернай падсветкай салона, датчыкамі дажджу, люстэркамі з электрычным складаннем, сядзеннем кіроўцы з памяццю налад і аўдыёсістэмай B&O з 10 дынамікамі. Камплектацыя Lariat таксама атрымае абаграванне рулявога кола.

Афіцыйныя цэны на Ford Ranger 2027 году пакуль невядомыя. Для параўнання: базавая версія Ranger XL 2026 мадэльнага году ў ЗША каштуе ад 35 445 долараў з улікам дастаўкі. Чакаецца, што пасля абнаўлення кошт крыху вырасце.