У Беларусі рыхтуюць маштабныя змены ў аплаце праезду
- 23.10.2026, 9:42
Яны закрануць усе гарады краіны.
У 2027 годзе ва ўсіх гарадах Беларусі плануюць увесці адзіную сістэму аплаты праезду ў грамадскім транспарце. Пасажыры змогуць разлічвацца не толькі звыклымі талонамі, але і банкаўскімі карткамі або праз мабільныя прыкладанні. Пра гэта распавёў начальнік упраўлення аўтамабільнага і гарадскога пасажырскага транспарту Мінтранса Андрэй Гладкі, перадае БелТА.
Паводле слоў прадстаўніка Мінтранса, цяпер транспартныя арганізацыі праводзяць закупкі і набываюць абсталяванне, неабходнае для ўкаранення новай сістэмы.
«У поўным аб'ёме такая сістэма функцыянуе ў Мінску. У 2027 годзе яна будзе ўкаранёна ва ўсіх гарадах», — паведаміў Гладкі.
У бліжэйшай будучыні аплачваць паездкі ў гарадскім транспарце можна будзе некалькімі спосабамі: папяровым талонам, банкаўскай карткай або праз мабільнае прыкладанне.
Паралельна ў Беларусі распрацоўваюць адзіную дзяржаўную сістэму продажу білетаў на прыгарадныя і міжгароднія пасажырскія перавозкі. Яна павінна аб'яднаць інфармацыю пра маршруты, рэйсы і вольныя месцы, якую цяпер даводзіцца шукаць на розных сэрвісах.
Паводле слоў Гладкага, адпаведны ўказ ужо падпісаны, а ўрад зацвердзіў парадак перадачы дадзеных у новую інфармацыйную сістэму. Перавозчыкі павінны будуць падаваць звесткі пра маршруты, рэйсы, кіроўцаў і транспартныя сродкі.
Распрацоўку праграмнага забеспячэння плануюць завяршыць да канца 2026 года. З 1 лютага 2027-га аператары і перавозчыкі змогуць пачаць уносіць неабходную інфармацыю.
«Аб'яднаем рэсурсы ў адну інфармацыйную сістэму. Пры гэтым функцыянаванне суправаджальных сістэм браніравання, продажу білетаў не забараняецца», — патлумачыў Гладкі.
У выніку пасажыры змогуць праз адзіную платформу ГІС «Продаж білетаў» паглядзець даступныя рэйсы, праверыць наяўнасць вольных месцаў і выбраць адпаведны маршрут. Пры гэтым існыя сэрвісы браніравання і куплі білетаў працягнуць працаваць.
Дакладную дату, калі новая платформа стане даступнай пасажырам, прадстаўнік Мінтранса не назваў.