У Беларусі плануюць запусціць сельскія маршруткі

• 23.10.2026, 13:29

Пілотны праект рэалізуецца ў Маларыцкім раёне.

У Беларусі разглядаюць магчымасць пашырыць практыку арганізацыі прыгарадных пасажырскіх перавозак па заяўцы. Пра гэта ўчора паведаміў журналістам начальнік упраўлення аўтамабільнага і гарадскога пасажырскага транспарту Мінтранса Андрэй Гладкі, паведамляе БелТА.

Пілотны праект з канца верасня рэалізуецца ў Маларыцкім раёне Брэсцкай вобласці.

Перавозкі па заяўцы працуюць так: аўтобус або маршрутка адпраўляецца па маршруце або заязджае ў маланаселены пункт толькі тады, калі ад пасажыраў загадзя паступіла заяўка. Такім чынам, жыхары невялікіх населеных пунктаў не застануцца адрэзанымі ад гарадоў: транспарт гарантавана прыедзе, калі ёсць заяўка.

Схему распрацавала Міністэрства транспарту і камунікацый, каб вырашыць праблему транспартных зносін у рэгіёнах з невялікім пасажырапатокам.

«Паглядзім, як зарэкамендуе сябе праект на тэрыторыі Брэсцкай вобласці і, пачынаючы з 2027 года, будзем паўсюдна ўкараняць яго, каб людзі, якія жывуць у малых населеных пунктах, мелі магчымасць карыстацца транспартнымі паслугамі», — адзначыў Андрэй Гладкі.