Раптоўна памёр вядомы расійскі акцёр-прапагандыст

• 23.10.2026, 14:32

Ён выканаў адну з галоўных роляў у фільме «Мы з будучыні».

У Расіі раптоўна пайшоў з жыцця 44-гадовы акцёр Андрэй Цярэнцьеў, які атрымаў шырокую вядомасць дзякуючы ролі Спірта ў фантастычным фільме «Мы з будучыні». Пра смерць артыста паведамілі расійскія СМІ, піша «Главред».

Як стала вядома з расійскіх крыніц і паведамленняў блізкіх артыста, акцёр памёр уначы з 19 на 20 кастрычніка. Прычынай раптоўнай смерці стала занядбаная адкрытая язва страўніка, якая справакавала вострую сардэчную недастатковасць і спыненне сэрца. Прадстаўнікі расійскай кінакампаніі «Триикс Медиа» выказалі спачуванні ў сувязі з нечаканай стратай.

«Гледачам ён запомніўся па многіх ролях у нашых фільмах і серыялах. Не верыцца, што яго больш з намі няма. Вечная памяць», — заявіла генеральны прадзюсар Інэса Юрчэнка.

Андрэй Цярэнцьеў выканаў галоўныя ролі ў кінапраектах «Філін», «Падсудны» і «Уцякач». Таксама ён здымаўся ў праектах «Марскія д'яблы — 4», «Пытанне гонару», «Пілігрым», «Мы з будучыні» і іншых. Акцёра пахаваюць у Казані пасля развітання ў Санкт-Пецярбургу.

Санкцыі Украіны

Андрэй Цярэнцьеў публічна не выступаў з разгорнутымі палітычнымі заявамі адносна поўнамаштабнай вайны ва Украіне. Аднак у 2021 годзе ён зняўся ў расійскім мастацкім фільме «Сонцаспёк», прысвечаным пачатку вайны Расіі супраць Украіны ў 2014 годзе на Данбасе. З-за ўдзелу ў гэтай стужцы, якую ўкраінскі бок і Міністэрства культуры кваліфікавалі як кінапрапаганду, акцёр быў унесены ў пералік асоб, якія ствараюць пагрозу нацыянальнай бяспецы Украіны.