Расія і Украіна правялі абмен палоннымі праз Беларусь

• 23.10.2026, 14:33

Абмен адбыўся па формуле «270 на 270».

23 кастрычніка з тэрыторыі РФ былі вярнутыя 270 украінскіх вайскоўцаў. Узамен перададзеныя 270 ваеннапалонных акупантаў. Вярнутыя расійскія вайскоўцы цяпер знаходзяцца на тэрыторыі Рэспублікі Беларусь.

Таксама Украіна вярнула сямёх грамадзянскіх асоб, якія знаходзіліся на тэрыторыі РФ. Столькі ж грамадзянскіх асоб вярнуліся ў Расію. Пра гэта піша Упаўнаважаны Вярхоўнай Рады Украіны па правах чалавека Дзмітрый Лубінец.

Ён адзначыў, што абмен адбыўся пры падтрымцы Міжнароднага камітэта Чырвонага Крыжа ў межах дамоўленасцяў з расійскай упаўнаважанай па правах чалавека Янай Лантратавай. Сярод тых, хто вярнуўся дадому, — 90-гадовая маламабільная жанчына і 50-гадовая ўкраінка, якая перанесла інфаркт міякарда, інсульт і пакутуе ад іншых захворванняў.

«Улічваючы стан здароўя абедзвюх жанчын, пры арганізацыі іх вяртання былі забяспечаны неабходныя ўмовы транспарціроўкі», — дадаў Лубінец.

Таксама ў межах абмену ўдалося вярнуць дадому маладую жанчыну з дзіцем, якая на пачатку поўнамаштабнага ўварвання знаходзілася ў Марыупалі. З-за баявых дзеянняў і акупацыі горада яна не змагла вярнуцца да сям'і. Значнай перашкодай стала афармленне дакументаў на дзіця. Цяпер яны ўжо дома, хаця і маюць патрэбу ў псіхалагічнай падтрымцы, але шчаслівыя быць ва Украіне, падкрэсліў Лубінец.

Напярэдадні бакі правялі абмен целамі загінулых вайскоўцаў па формуле 252 на 25.

Мінулы раз абмен палоннымі адбыўся па формуле «103 на 103»: 19 жніўня бакі перадалі адзін аднаму людзей на пункце пропуску «Новая Гута» ў Гомельскай вобласці Беларусі.