Зяленскі: За мяжой знаходзяцца 9,5 мільёна грамадзянаў Украіны

• 23.10.2026, 21:07

Гэта больш, чым насельніцтва Беларусі.

Прэзідэнт Уладзімір Зяленскі заявіў, што з-за поўнамаштабнай вайны за мяжой знаходзяцца 9,5 мільёна грамадзянаў Украіны.

Пра гэта ён сказаў падчас анлайн-сустрэчы ў Інстытуце Гудзона..

«Зараз за мяжой знаходзяцца 9,5 мільёна цывільных асоб. Гэтая вайна прымусіла іх пакінуць Украіну. 9,5 мільёна. Ці можаце вы сабе гэта ўявіць: калі насельніцтва вашай краіны складае 40 мільёнаў, ці можаце ўявіць, што 20–25% з іх знаходзяцца за мяжой з самага пачатку гэтага поўнамаштабнага ўварвання?» — сказаў прэзідэнт Украіны.

Паводле яго слоў, «ідзе гаворка пра мільёны людзей, якія страцілі жыццё, свае дамы, сваю працу».

Менавіта таму, — падкрэсліў Зяленскі, — Украіна разлічвае на гарантыі бяспекі ад партнёраў, «якія не дадуць Расіі магчымасці вярнуцца зноў».

«То-бок, як я ўжо казаў, ідзе гаворка пра двухбаковыя гарантыі бяспекі паміж намі і амерыканцамі — над гэтым усе працуюць. Альбо — пра наша сяброўства ў НАТА. Гэта ўжо іншае пытанне; гэта іншыя гарантыі бяспекі, але яны, безумоўна, павінны быць надзейнымі. Гэта першае і другое. Усе гэтыя пункты прысутнічаюць у кожным плане, які мы ўжо абмяркоўвалі з рознымі саюзнікамі; гэта надзвычай важна — гэта ключавы элемент нашых перамоў», — дадаў кіраўнік дзяржавы.

Звяртаем увагу: паводле звестак Белстата, насельніцтва Беларусі на 1 студзеня 2026 года складае 9 056 080 чалавек. Паводле незалежных аналітыкаў, у Беларусі можа пражываць і ўвогуле каля 8 мільёнаў.