У Расіі растуць пратэстныя настроі

• 24.10.2026, 6:32

Рэйтынг урада моцна ўпаў.

Настроі расіян пагоршыліся пасля выбараў у Дзярждуму. Гэта фіксуюць як прызнаны «замежным агентам» «Левада-цэнтр», так і дзяржаўны ВЦІОМ, адзначае «Можем объяснить». У цяжкім эканамічным становішчы грамадзяне вінавацяць федэральны ўрад. Апытанні праводзіліся яшчэ да перастановак у яго кіраўніцтве, што адбыліся на гэтым тыдні.

Паводле дадзеных ВЦІОМ, рэйтынг адабрэння ўрада за трэці тыдзень кастрычніка ўпаў з 44,3% да 40,1%. Так нізка ён не апускаўся з вясны, калі паказчык дасягаў 39% — найніжэйшага значэння з пачатку вайны. Пасля гэтага ВЦІОМ змяніў методыку, пачаў спалучаць тэлефонныя і пакватэрныя апытанні, і рэйтынг урада, як і прэзідэнта і партыі ўлады, рэзка вырас да верасня. У перыяд выбараў у Дзярждуму ён дасягаў 48,3%, што амаль на пятую частку вышэй за цяперашні. Амаль на пятую частку абваліўся і рэйтынг «Адзінай Расіі»: з 36,5% у верасні да 30% у кастрычніку.

«Левада-цэнтр» фіксуе рост негатыўных ацэнак становішча спраў у краіне. Колькасць тых, хто лічыць эканамічную сітуацыю дрэннай, вырасла да 25% — гэта максімум з першага года вайны. Добрай яе называюць толькі 19%. З пачатку года працягвае змяншацца частка тых, хто ацэньвае сітуацыю як сярэднюю: цяпер іх 53%.

Палітычную сітуацыю 61% апытаных называюць напружанай або выбуханебяспечнай. Словы «крытычная, выбуханебяспечная» выкарыстоўваюць ужо 11%, яшчэ 50% гавораць пра напружанасць. Спрыяльнай абстаноўку лічаць толькі 10% расіян.

Найлепш становішча ацэньваюць масквічы: сярод іх колькасць станоўчых і адмоўных ацэнак адрозніваецца нязначна (46% аптымістаў супраць 52% песімістаў). Найгорш настроены жыхары буйных гарадоў з насельніцтвам ад паўмільёна чалавек: пра спрыяльную сітуацыю там кажуць 33%, а пра напружаную або выбуханебяспечную — 64%.