Паўла Севярынца абралі старшынём партыі БХД
- 24.10.2026, 20:44
За яго прагаласавалі амаль усе дэлегаты.
24 кастрычніка ў Беластоку праходзіць з'езд Беларускай хрысціянскай дэмакратыі (БХД). У ім бяруць удзел беларусы, якія прыехалі з Літвы, Польшчы, Латвіі, Чэхіі, Бельгіі і Францыі.
Галоўнай падзеяй з'езду сталі выбары старшыні. У бюлетэнях было толькі адно прозвішча — Паўла Севярынца. На пасаду старшыні таксама быў вылучаны Георгій Дзмітрук, але ён зняў сваю кандыдатуру, перадае «Радыё Рацыя».
Права галасаваць мелі толькі сябры БХД. На з'ездзе таксама прысутнічаюць госці, прадстаўнікі іншых партый — як беларускіх, так і замежных, — і журналісты.
Такім чынам, выбары старшыні ператварыліся ў таемнае галасаванне за адабрэнне або супраць яго кандыдатуры. У выніку з 96 сябраў БХД, якія мелі права голасу на з'ездзе, 94 падтрымалі кандыдатуру Севярынца. Двое дэлегатаў прагаласавалі супраць палітыка.
Павал Севярынец выступіў на з'ездзе з праграмнай прамовай. Таксама ён прапанаваў кандыдатуры намеснікаў старшыні: Сяргея Верамеенкі, Георгія Дзмітрука, Таісіі Кабанчук, Валерыя Мацкевіча і Анатоля Міхнаўца.
Акрамя выбараў старшыні, з'езд выбірае Нацыянальную раду БХД, у якую ўвойдуць 30 чалавек.
Што гэта значыць?
Роўна 100 гадоў таму, 24 кастрычніка 1926 года, беларуская хрысціянска-дэмакратычная арганізацыя ў Вільні атрымала назву БХД.
Калі раней, яшчэ падчас дзейнасці ў Беларусі, хоць і без рэгістрацыі, у партыі БХД адначасова было трое кіраўнікоў, то цяпер, да стагоддзя арганізацыі, яна фактычна падзялілася на дзве часткі. Адна з іх, якой паводле вынікаў выбараў 24 кастрычніка 2026 года працягне кіраваць Павал Севярынец, праводзіць з'езд. Другім напрамкам займаецца Віталь Рымашэўскі, былы сустаршыня БХД разам з Севярынцам і Вольгай Кавальковай.
За тыдзень да беластоцкага з'езду, 17–18 кастрычніка, у Варшаве адбылася сустрэча руху «Беларуская салідарнасць / Беларускія хрысціянскія дэмакраты», звязанага з Віталём Рымашэўскім. Яго сустаршынямі сталі сам Рымашэўскі, Вольга Алейнік, Дзяніс Садоўскі і Ксенія Палуэктава. Паводле слоў арганізатараў, у сустрэчы ўдзельнічалі больш за 80 чалавек.
«Калі я выйшаў з турмы, тут былі разваленыя некалькі груп, якія нават не хацелі размаўляць адна з адной. Цяпер, дзякуй Богу, большасць дамовілася, і большасць будзе на з'ездзе ў Беластоку», — казаў Севярынец у інтэрв'ю «Радыё Свабода».
Аднак Віталь Рымашэўскі, якому Севярынец прапаноўваў прыехаць у Беласток, адмовіўся ад удзелу ў з'ездзе і заявіў, што гэта зусім розныя плыні, а адрозненні паміж імі палягаюць у ідэалогіі.