Reuters: Сі Цзіньпін адмовіўся сустрэцца з Кім Чэн Ынам

• 25.10.2026, 11:46

Паўночнакарэйскага дыктатара вітаў чацвёрты па значнасці ў кітайскай іерархіі чыноўнік.

Дыктатар Паўночнай Карэі Кім Чэн Ын наведаў Кітай з візітам, аднак асабіста з кіраўніком Кітая Сі Цзіньпінам не сустрэўся.

Як піша Reuters, Кім прыбыў у кітайскі памежны горад Даньдун, падчас візіту яго суправаджаў Ван Хунін — чацвёрты паводле значнасці чыноўнік у кіраўніцтве КНР. Адзначаецца, што Ван перадаў лідару КНДР «прывітанне» ад Сі Цзіньпіна.

Кім Чэн Ын прыбыў у Даньдун па новым мосце праз раку Ялуцзян, які злучае КНДР і Кітай. Адкрыццё гэтага моста раней у гэтым месяцы стала чарговым сведчаннем пацяплення адносін паміж Пекінам і Пхеньянам.

Кітай застаецца для Пхеньяна галоўным эканамічным і дыпламатычным партнёрам; на долю КНР прыпадае асноўная частка афіцыйнага тавараабароту КНДР.

І хоць многія аналітыкі лічаць, што паглыбленне ваеннага супрацоўніцтва Паўночнай Карэі з Расіяй можа зрабіць Пхеньян менш залежным ад Пекіна, паездка Кіма Чэн Ына сведчыць пра аднаўленне намаганняў Кітая і Паўночнай Карэі па ўмацаванні эканамічных сувязяў.

На кадрах візіту, якія транслявалі кітайскія дзяржаўныя СМІ, бачна, як Кім Чэн Ын ідзе па мосце ў бок Паўночнай Карэі, а ўздоўж яго шляху стаяць людзі, якія размахваюць сцягамі.

Акрамя таго, Кім Чэн Ын наведаў у Даньдуне мемарыял, прысвечаны Карэйскай вайне, а таксама аўтамабільны завод.

Апошні вядомы візіт Кіма Чэн Ына ў Кітай адбыўся ў верасні 2025 года: ён прыбыў у Пекін для ўдзелу ў святкаванні 80-й гадавіны Дня Перамогі, у межах якога правёў сустрэчу са старшынём КНР Сі Цзіньпінам. У чэрвені таго ж года Сі Цзіньпін здзейсніў дзяржаўны візіт у КНДР.