Аляксандра Сасновіч прабілася ў асноўную сетку турніру WTA-500 у Токіа

• 25.10.2026, 14:08

У фінальным раўндзе кваліфікацыі беларуска перамагла прадстаўніцу Узбекістана.

Беларуская тэнісістка і трэцяя ракетка краіны Аляксандра Сасновіч 25 кастрычніка прабілася ў асноўную сетку турніру WTA-500, які праходзіць у Токіа. Пра гэта паведамляе тэлеграм-канал Нацыянальнага алімпійскага камітэта Беларусі.

У фінальным раўндзе кваліфікацыі Сасновіч згуляла супраць прадстаўніцы Узбекістана Камілы Рахімавай, якая займае 67-е месца ў рэйтынгу. Спартсменкі правялі на корце дзве гадзіны, за якія лік стаў 6:4, 6:4 на карысць беларускі.

У першым раўндзе кваліфікацыі тэнісістка, якая займае 122-е месца ў рэйтынгу, перамагла ўкраінскую спартсменку Юлію Старадубцаву з 50-й пазіцыі WTA. Іх сустрэча доўжылася без адной хвіліны дзве гадзіны і скончылася з лікам 6:4, 7:5.

Матчы асноўнай сеткі пачнуцца 26 кастрычніка і будуць доўжыцца да 1 лістапада. За перамогу ў адзіночным разрадзе пазмагаюцца 28 тэнісістак, а ў парным — 16 дуэтаў.

Дзейная чэмпіёнка — швейцарка Белінда Бенчыч. У мінулым годзе ў вырашальным паядынку яна перамагла чэшку Лінду Носкавую (6:2, 6:3).

Прызавы фонд турніру складае больш за 1,2 млн долараў.