Зяленскі: Украіна не пагодзіцца на нейтралітэт і скарачэнне арміі

• 25.10.2026, 22:44

Ключавыя патрабаванні Масквы выключаныя з перамоваў.

Спецпрадстаўнік прэзідэнта ЗША Стыў Уіткоф перадаў расійскаму дыктатару Уладзіміру Путіну дакумент з рознымі наработкамі амерыканскага боку па завяршэнні вайны ва Украіне.

Пра гэта заявіў украінскі прэзідэнт Уладзімір Зяленскі, паведамляе «РБК-Украіна» са спасылкай на інтэрв'ю для вядучай «ТСН. Тыдзень» Аллы Мазур.

«У дакуменце ёсць розныя наработкі амерыканскага боку. Мы лічым, што галоўныя аспекты заключаюцца ў тым, што мы не можам гаварыць пра нейтралітэт нашай дзяржавы і абмежаванне ўкраінскай арміі», — падкрэсліў Зяленскі.

Пры гэтым кіраўнік дзяржавы не стаў раскрываць, ці прапісаныя ў дакуменце «чырвоныя лініі» Украіны. Прэзідэнт патлумачыў, што не можа распавесці пра ўсе дэталі з-за дамоўленасцяў з ЗША.

На гэтым фоне Зяленскі нагадаў, што гарантыі бяспекі для Украіны не могуць вызначацца расійскім бокам.

«Такім чынам, абмежаванне нашай арміі і нейтралітэт Украіны не абмяркоўваюцца. Пытанне тэрыторый — гэта «чырвоная лінія», якая можа абмяркоўвацца выключна на ўзроўні лідараў. Гэта для нас заўсёды было канстантай. Але пытанне тэрыторый амерыканцы часта падымаюць: на што мы гатовыя абменьваць тыя ці іншыя прынцыповыя рэчы», — адзначыў Зяленскі.

Кіраўнік дзяржавы нагадаў, што Украіна не збіраецца нічога абменьваць, але гатовая да абмеркавання.

«Калі гаворка ідзе пра абмеркаванне тэрытарыяльнага пытання, то гэта ўзровень лідараў. Іншыя пытанні — на ўзроўні тэхнічных груп. Што маецца на ўвазе? Гарантыі бяспекі. Калі гаворка ідзе пра НАТА — і, безумоўна, гэтае пытанне з'яўляецца ў адпаведных дакументах і новых наработках, — то ўзнікае пытанне НАТА. Мы абмяркоўваем гарантыі бяспекі, і нехта павінен браць на сябе [абавязацельствы]», — падкрэсліў Зяленскі.

Па яго словах, у гэтым пытанні Украіна разлічвае менавіта на ЗША і Еўропу.

Ён таксама патлумачыў, што дакумент Уіткофа — гэта не план, які перадалі Пуціну на зацвярджэнне.

«Паколькі не Расія прымае рашэнне. Прымаюць рашэнні ўсе бакі. Ёсць прапановы для абмеркавання, у тым ліку з боку ЗША. Яны абмяркоўваюць гэтыя прапановы з намі», — падсумаваў Зяленскі.